Винисиус Жуниор ва Жозе Моуринью: Реал Мадрид юлдузи жамоада қоладими?

Жозе Моуринью кутилмаганда Реал Мадрид бош мураббийлигига қайтиши ҳақидаги хабарлар "Сантяго Бернабеу"да катта шов-шувга сабаб бўлди. Бироқ, бу тайинлов жамоанинг асосий юлдузи Винисиус Жуниор келажагини сўроқ остида қолдирмоқда. Бразилиялик ҳужумчи ва португалиялик мутахассис ўртасидаги муносабатлар, айниқса, феврал ойида Чемпионлар лигаси доирасида юз берган можародан сўнг анча таранглашган эди. Бу ҳақда Goal.com хабар беради.

Моуринью Мадрид клуби билан уч йиллик шартнома имзолагани айтилмоқда, аммо бу келишув Флорентино Перезнинг 7-июн куни бўлиб ўтадиган президентлик сайловларидаги ғалабасига боғлиқ. "Maxсус" лақабли мураббийнинг қайтиши Винисиус Жуниор учун кутилмаган синов бўлиши мумкин. Феврал ойида Моуринью Benfica бош мураббийи сифатида Винисиус Жуниор билан очиқчасига зиддиятга борган ва футболчининг майдондаги хулқ-атворини танқид қилган эди.

Ўшанда "Эстадио да Луз"да бўлиб ўтган баҳсда Винисиус Жуниор гол урганидан сўнг рақиб футболчиси Джанлука Престианни томонидан ирқий ҳақорат қилинганини даъво қилган. UEFA якунда Престианни олти ўйинга четлатган бўлса-да, Моуринью ўшанда футболчини айблаб, унинг нишонлаш услубини танқид қилган эди. Бу воқеа икки томон ўртасида совуқчилик пайдо бўлишига сабаб бўлган.

Шунга қарамай, BBC Sport нашрининг хабар беришича, Винисиус Жуниор ҳамон ўз келажагини Реал Мадрид билан боғламоқда. Унинг амалдаги шартномаси 2027-йилгача мўлжалланган, бироқ янги битим бўйича музокаралар бироз секинлашган. Футболчи ўзининг молиявий шартлари Килиан Мбаппе каби янги келган юлдузлар даражасида бўлишини истамоқда.

Келгуси мавсумда Ла Лига доирасидаги ўйинлар нафақат майдондаги натижалар, балки Моуринью ва Винисиус Жуниор ўртасидаги муносабатлар қандай шаклланиши билан ҳам диққат марказида бўлади. Агар мураббий бразилиялик юлдузга керакли ёрдамни бера олса, бу ҳамкорлик янги ғалабаларга йўл очиши мумкин, акс ҳолда бу клубдаги катта ўзгаришларга туртки бўлади.